២២:៤៥
១៨.១០.២០២២
ថ្ងៃអង្គារ ទី ១៨ ខែតុលា៖
- ប្រធានាធិបតីអ៊ុយក្រែនលោក Volodymyr Zelenskyy បាននិយាយនៅថ្ងៃអង្គារនេះថា ការវាយប្រហារតាមអាកាសរបស់រុស្ស៊ីក្នុងរយៈពេលមួយសប្តាហ៍កន្លងទៅនេះ បានបំផ្លាញទីតាំងថាមពលរបស់អ៊ុយក្រែនអស់ប្រមាណ៣០ភាគរយ។ លោកបាននិយាយដូចនេះតែប៉ុន្មានម៉ោងប៉ុណ្ណោះបន្ទាប់ពីមានការវាយប្រហារថ្មីមួយទៀត ដែលបានកាត់ផ្តាច់ចរន្តអគ្គិសនីនៅតាមទីក្រុងនានាទូទាំងប្រទេសអ៊ុយក្រែននោះ។ រុស្ស៊ីបានវាយប្រហារចំទីតាំងថាមពលក្នុងរដ្ឋធានីកៀវ និងតំបន់នានាក្នុងទីក្រុងនៅទូទាំងប្រទេសអ៊ុយក្រែន ដែលបណ្តាលឱ្យមានការដាច់ចរន្តភ្លើង និងបង្អាក់ដល់ប្រព័ន្ធផ្គត់ផ្គង់ទឹកផងដែរ។ ការវាយប្រហារនេះកើតឡើងតែក្នុងរយៈពេលមួយថ្ងៃប៉ុណ្ណោះ បន្ទាប់ពីរដ្ឋធានីកៀវត្រូវទទួលរងការវាយប្រហារជាខ្លាំងដោយយន្តហោះដ្រូនអត្តឃាតនោះ។ ការវាយប្រហារកាលពីព្រលឹមថ្ងៃអង្គារនេះ បានចំទៅលើរដ្ឋធានីកៀវ និងទីក្រុង Kharkiv នៅភាគខាងកើត ហើយទីក្រុង Mykolaiv នៅភាគខាងត្បូង និងតំបន់ Dnipro និងតំបន់ Zhytomyr ភាគកណ្តាល។ ក្រុមមន្ត្រីអ៊ុយក្រែននិយាយថា មន្ទីរពេទ្យនានាដាច់ភ្លើងនិងបានប្រើប្រាស់ម៉ាស៊ីនភ្លើងជំនួសវិញ។ ប្រធានាធិបតីអ៊ុយក្រែនលោក Zelenskyy បានពណ៌នាការវាយប្រហាររបស់រុស្ស៊ីទៅលើគោលដៅហេដ្ឋារចនាសម្ព័ន្ធថាមពលជាច្រើនលើកច្រើនសារនេះ ថាជាសកម្មភាពមួយនៃ «ការវាយប្រហារភេរវកម្មរបស់រុស្ស៊ី»។ នេះបើតាមសេចក្តីរាយការណ៍របស់ទីភ្នាក់ងារព័ត៌មានAFP។
- វិមានក្រឹមឡាំងនៅថ្ងៃអង្គារនេះបានបដិសេធថា កងកម្លាំងរុស្ស៊ីមិនបានប្រើប្រាស់យន្តហោះដ្រូនដែលគ្មានមនុស្សបើក ដែលផលិតក្នុងប្រទេសអ៊ីរ៉ង់នោះឡើយ។ នេះបើតាមទីភ្នាក់ងារព័ត៌មាន Reuters។ មេដឹកនាំអ៊ុយក្រែនបានចោទប្រកាន់ប្រទេសរុស្ស៊ីថា បានប្រើប្រាស់យន្តហោះដ្រូនប្រភេទShahed-136 "kamikaze" ដែលផលិតក្នុងប្រទេសអ៊ីរ៉ង់ នៅក្នុងការវាយប្រហាររបស់ខ្លួនទៅលើរដ្ឋធានីកៀវនៃប្រទេសអ៊ុយក្រែន។ យន្តហោះដ្រូនប្រភេទនេះនឹងបំផ្ទុះខ្លួនវានៅពេលប៉ះនឹងឧបករណ៍អ្វីមួយ។ នៅពេលសួរថា តើប្រទេសរុស្ស៊ីមានបានប្រើប្រាស់យន្តហោះដ្រូនដែរឬទេនៅក្នុងប្រតិបត្តិការយោធារបស់ខ្លួនក្នុងប្រទេសអ៊ុយក្រែននោះ អ្នកនាំពាក្យវិមានក្រឹមឡាំងលោក Dmitry Peskov បាននិយាយថា វិមានក្រឹមឡាំងមិនមានព័ត៌មាននៃការប្រើប្រាស់ឧបករណ៍យោធារបស់កងទ័ពរុស្ស៊ីនោះឡើយ។
- ក្រុមហ៊ុនផលិតរថយន្ត Hyundai របស់ប្រទេសកូរ៉េខាងត្បូង កំពុងពិចារណាសម្រេចចិត្តលើប្រតិបត្តិការរបស់ខ្លួននៅក្នុងប្រទេសរុស្ស៊ី ដោយក្នុងនោះក៏រួមមានទាំងការអាចលក់រោងចក្ររបស់ខ្លួននៅទីនោះផងដែរ។ នេះបើយោងទៅលើបណ្តាញព័ត៌មានក្នុងស្រុក ហើយដែលត្រូវបានចេញផ្សាយបន្ដដោយទីភ្នាក់ងារព័ត៌មាន Reuters។ ក្រុមហ៊ុនផលិតរថយន្ត Hyundai កាលពីពេលថ្មីៗនេះ បានដាក់របាយការណ៍ទៅកាន់ថ្នាក់ដឹកនាំរបស់ក្រុមហ៊ុន ដោយវិភាគពីស្ថានភាពនិងការរំពឹងទុករបស់ខ្លួនក្នុងពេលអនាគតក្នុងប្រទេសរុស្ស៊ី។ នេះបើតាមកាសែត Dong-a Ilbo របស់កូរ៉េខាងត្បូង ដែលបានស្រង់ប្រភពឧស្សាហកម្មរថយន្តមួយ ដែលមិនបញ្ចេញឈ្មោះ។ រោងចក្រជាច្រើននៅក្នុងប្រទេសរុស្ស៊ី បានផ្អាកដំណើរការផលិតរបស់ខ្លួន និងផ្អាកបុគ្គលិកធ្វើការជាបណ្តោះអាសន្ន ដោយសារតែខ្វះគ្រឿងឧបករណ៍ដែលមានបច្ចេកទេសខ្ពស់ ដោយសារតែការដាក់ទណ្ឌកម្ម និងការចាកចេញនៃសហគ្រាសរោងចក្រប្រទេសលោកខាងលិចជាច្រើន ចាប់តាំងពីរុស្ស៊ីចូលឈ្លានពានប្រទេសអ៊ុយក្រែន កាលពីថ្ងៃទី២៤ ខែកុម្ភៈមក។
- ក្រសួងពាណិជ្ជកម្មសហរដ្ឋអាមេរិកបានឱ្យដឹងថា ខ្លួនបានចេញបទបញ្ជាមួយ ដោយបដិសេធសិទ្ធិនាំចេញរបស់ក្រុមហ៊ុនអាកាសចរណ៍រុស្ស៊ី Ural Airlines ដោយលើកឡើងពីអ្វីដែលជាការរំលោភបំពានទៅនឹងការនាំចេញដែលកំពុងកើតមានឡើង។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ បទបញ្ជានេះ ក៏បានបញ្ឈប់នូវសិទ្ធិរបស់ក្រុមហ៊ុនអាកាសចរណ៍រុស្ស៊ីនេះមិនឱ្យចូលរួមនៅក្នុងប្រតិបត្តិការជំនួញ ដែលស្ថិតនៅក្រោមបទបញ្ញត្តិនៃការនាំចេញរបស់សហរដ្ឋអាមេរិកផងដែរ។ រដ្ឋបាលរបស់ប្រធានាធិបតីសហរដ្ឋអាមេរិក លោក Joe Biden បានបង្កើនការបង្រ្កាបទៅលើក្រុមហ៊ុនអាកាសចរណ៍រុស្ស៊ី បន្ទាប់ពីប្រទេសនេះចូលឈ្លានពានប្រទេសអ៊ុយក្រែនមក ដោយបដិសេធមិនលក់គ្រឿងបន្លាស់យន្តហោះ ការចុះចតចាក់សាំង និងសេវាកម្មផ្សេងៗមួយចំនួនទៀត។
- ប៉ូលិសក្នុងប្រទេសន័រវែសបាននិយាយកាលពីថ្ងៃចន្ទម្សិលមិញថា ខ្លួនបានចាប់ខ្លួនជនសង្ស័យជនជាតិរុស្ស៊ីចំនួន៤នាក់ ពីបទរំលោភបំពានទៅលើបម្រាមការថតរូប ខណៈពេលដែលប្រទេសនេះកំពុងមានការបារម្ភពីការធ្វើវិចេ្ឆទកម្មនៅទីតាំងហេដ្ឋារចនាសម្ព័ន្ធសំខាន់ៗមួយចំនួនរបស់ខ្លួននោះ។ នេះបើតាមការចេញផ្សាយរបស់ទីភ្នាក់ងារព័ត៌មានAFP ។ ប្រទេសន័រវែស កំពុងស្ថិតក្នុងភាពប្រុងជើងការខ្ពស់ បន្ទាប់ពីមានរបាយការណ៍ជាច្រើនស្តីពីការប្រទះឃើញយន្តហោះដ្រូនដែលគេមិនស្គាល់អត្តសញ្ញាណ បានហោះនៅជិតទីតាំងរុករកប្រេងនិងឧស្ម័ននៅក្នុងសមុទ្រ ដែលជារបស់ក្រុមហ៊ុនផលិតថាមពលដ៏ធំមួយនោះ។ ការចាប់ខ្លួនជនជាតិរុស្ស៊ីទាំង៤នាក់កាលពីថ្ងៃចន្ទនោះ កើតមានឡើងតែប៉ុន្មានថ្ងៃប៉ុណ្ណោះ បន្ទាប់ពីប៉ូលិសន័រវែសបានចាប់ជនជាតិរុស្ស៊ី២នាក់ នៅក្នុងព្រឹត្តិការណ៍២ដាច់ដោយឡែកពីគ្នាកាលពីសប្តាហ៍មុន។ ជនជាតិរុស្ស៊ីទាំង២នាក់នេះ ត្រូវបានចោទចោទប្រកាន់ពីបទបង្ហោះដ្រូនដើម្បីថតរូបភាពឬវីដេអូ។
២២:១៦
១៩.១០.២០២២
ថ្ងៃពុធ ទី ១៩ ខែតុលា៖
- ពួកគណបក្សសាធារណរដ្ឋបាននិយាយកាលពីថ្ងៃអង្គារថា ពួកគេនឹងមិនផ្តល់ប្រាក់ដល់ប្រទេសអ៊ុយក្រែនដែលហែកហួរដោយសង្គ្រាមទៀតទេ ប្រសិនបើ ពួកគេធ្វើឱ្យជឿនលឿនដូចការរំពឹងទុកដើម្បីត្រួតត្រារដ្ឋសភានៅក្នុងការបោះឆ្នោតពាក់កណ្តាលអាណត្តិ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ ការព្រមានមកពីលោក Kevin McCarthyមេដឹកនាំសំឡេងភាគតិចរបស់រដ្ឋសភាជាសញ្ញាផ្លូវការលើកដំបូងថា រដ្ឋាភិបាលក្រុងកៀវអាចប្រឈមនឹងការប្រយុទ្ធដ៏ស្វិតស្វាញដើម្បីទទួលបានថវិកានៅពេលដែលខ្លួនការពារការឈ្លានពានរបស់រុស្ស៊ីដែលបានទទួលការគាំទ្ររបស់គណបក្សទាំង២ចាប់ផ្តើមធ្លាក់ចុះនៅក្នុងសហរដ្ឋអាមេរិក។ លោក McCarthy សង្ឃឹមថានឹងក្លាយជាប្រធានរដ្ឋសភាដែលជាតួនាទីជាន់ខ្ពស់លំដាប់ទី៣នៅក្នុងនយោបាយសហរដ្ឋអាមេរិកបន្ទាប់ពីប្រធានាធិបតី និងអនុប្រធានាធិបតី ប្រសិនបើពួកសាធារណរដ្ឋកាន់កាប់រដ្ឋសភានៅឆ្នាំក្រោយ។ លោកបាននិយាយទៀតថា លោករំពឹងថា ពួកអ្នកបោះឆ្នោតនឹងដាក់ទណ្ឌកម្មពួកគណបក្សប្រជាធិបតេយ្យនៅក្នុងការបោះឆ្នោតខែវិច្ឆិកាចំពោះការធ្វេសប្រហែសបញ្ហាអាទិភាពនៅក្នុងប្រទេសដូចជាវិបត្តិអន្តោប្រវេសន៍ដែលកំពុងរីកកាន់តែធំឡើងនៅឯព្រំដែនភាគខាងត្បូង។
- សហភាពអឺរ៉ុបកំពុងធ្វើការឆ្ពោះទៅកាន់ការដាក់ទណ្ឌកម្មថ្មីទៀតលើប្រទេសអ៊ីរ៉ង់បន្ទាប់ពីប្រមូលបាន«ភស្តតាងគ្រប់គ្រាន់»ថា អ៊ីរ៉ង់កំពុងផ្គត់ផ្គង់ដ្រូនដ៏ប្រល័យទៅឱ្យរុស្ស៊ីដើម្បីប្រើប្រាស់នៅក្នុងប្រទេសអ៊ុយក្រែន។ នេះបើតាមការបញ្ជាក់របស់អ្នកនាំពាក្យសហភាពអឺរ៉ុបកាលពីថ្ងៃពុធហើយត្រូវបានរាយការណ៍ដោយទីភ្នាក់ងារព័ត៌មាន AFP។ លោកស្រី Nabila Massraliអ្នកនាំពាក្យរបស់ប្រធានគោលនយោបាយការបរទេសសហភាពអឺរ៉ុបលោកJosep Borrellបាននិយាយថា៖ «ឥឡូវនេះ យើងបានប្រមូលភស្តុតាងផ្ទាល់របស់យើងគ្រប់គ្រាន់ដែលការងារនេះកំពុងបន្តធ្វើនៅក្នុងក្រុមប្រឹក្សាអឺរ៉ុបដើម្បីធ្វើការឆ្លើយតបឱ្យច្បាស់និងខ្លាំង»។ ពួកអ្នកការទូតសហភាពអឺរ៉ុបបានប្រាប់ទីភ្នាក់ងារព័ត៌មានAFPថា មានការងារដែលកំពុងធ្វើនៅថ្ងៃពុធដើម្បីធ្វើបញ្ជីឈ្មោះរបស់បុគ្គលនិងអង្គភាពអ៊ីរ៉ង់ដែលមានជាប់ទាក់ទិននឹងដ្រូនដែលនឹងត្រូវបន្ថែមទៅក្នុងបញ្ជីខ្មៅដាក់ទណ្ឌកម្មរបស់សហភាពអឺរ៉ុប។ អ្នកការទូតម្នាក់បាននិយាយថា គេរំពឹងថា បញ្ជីឈ្មោះនោះនឹងត្រូវសម្រេចផ្តាច់ព្រ័ត្រនៅក្នុងជំនួបរបស់មេដឹកនាំអឺរ៉ុបដែលចាប់ផ្តើមនៅយប់ថ្ងៃព្រហស្បតិ៍។ សហភាពអឺរ៉ុបកាលពីថ្ងៃចន្ទបានដាក់ទណ្ឌកម្មជុំចុងក្រោយរបស់ខ្លួនលើអ៊ីរ៉ង់អំពីការ ស្លាប់របស់នាង Mahsa Amini អាយុ២២ឆ្នាំដែលត្រូវបានចាប់ខ្លួនដោយប៉ូលិសសីលធម៌ ហើយនឹងការបង្ក្រាបលើការតវ៉ាប្រឆាំងរបស់របបនេះដែលបានកើតមានឡើង។
- ប្រទេសរុស្ស៊ីទំនងនឹងត្រូវការពេលពី២ទៅ៤ឆ្នាំដើម្បីស្ថាបនាសមត្ថភាពយោធារបស់ខ្លួនឡើងវិញឱ្យខ្លាំងក្លាដូចមុនសង្គ្រាមអ៊ុយក្រែន។ នេះបើតាមការបញ្ជាក់របស់រដ្ឋមន្ត្រីការពារជាតិអេស្តូនីកាលពីថ្ងៃអង្គារដោយលោកបានជំរុញឱ្យបន្តដាក់សម្ពាធលើរដ្ឋាភិបាលក្រុងមូស្គូហើយត្រូវបានរាយការណ៍ដោយទីភ្នាក់ងារព័ត៌មាន AFP។ នៅក្នុងដំណើរទស្សនកិច្ចទៅកាន់រដ្ឋធានីវ៉ាស៊ីនតោន លោករដ្ឋមន្ត្រីការពារជាតិ Hanno Pevkurបានទស្សន៍ទាយពីសង្គ្រាមរយៈពេលយូរ ហើយបានជំរុញឱ្យប្រទេសលោកខាងលិចរួបរួមគ្នាជាមួយពលរដ្ឋអ៊ុយក្រែនរហូតទាល់តែពួកគេទទួលបានជ័យជម្នះសម្រាប់«ពិភពលោកសេរី»។
- នាយកទីភ្នាក់ងាររដ្ឋនុយក្លេអ៊ែររបស់អ៊ុយក្រែន Energoatomបាននិយាយកាលពីថ្ងៃពុធថា បុគ្គលិកប្រហែល៥០នាក់នៃរោងចក្រថាមពលនុយក្លេអ៊ែរ Zaporizhzhiaដែលត្រួតត្រាដោយរដ្ឋាភិបាលរុស្ស៊ីនៅក្នុងតំបន់ភាគខាងត្បូងប្រទេសអ៊ុយក្រែនបានត្រូវឃុំខ្លួនដោយពួករុស្ស៊ី។ លោកPetro Kotin បានប្រាប់ទីភ្នាក់ងារព័ត៌មាន AFPថា៖ «មនុស្សជាង១៥០នាក់មកពីរោងចក្រនោះបានត្រូវចាប់ខ្លួន»ចាប់តាំងពីការចាប់ផ្តើមនៃការឈ្លានពានរបស់រុស្ស៊ីកាលពីចុងខែកុម្ភៈមក។ លោកបាននិយាយទៀតថា បុគ្គលិកខ្លះត្រូវបានគេដោះលែង ក៏ប៉ុន្តែ មានបុគ្គលិកខ្លះទៀតនៅគេមិនទាន់ដឹងអំពីជោគវាសនារបស់ពួកគេទេ។ លោកបាននិយាយទៀតថា៖ «មនុស្សប្រហែល៥០នាក់នៅស្ថិតក្នុងការឃុំខ្លួននៅឡើយ។ ពួកគេជាបុគ្គលិករោងចក្រ»។
- ប្រទេសអ៊ីស្រាអែលនឹងមិនបញ្ជូនអាវុធទៅឱ្យអ៊ុយក្រែនទេ។ នេះបើតាមការបញ្ជាក់របស់រដ្ឋមន្ត្រីការពារជាតិអ៊ីស្រាអែលលោកBenny Gantz កាលពីថ្ងៃពុធ ក្នុងរយៈពេល២ថ្ងៃបន្ទាប់មក ក្រោយពីរុស្ស៊ីបានព្រមានថា ចំណាត់ការរបស់អ៊ីស្រាអែលដើម្បីធ្វើឱ្យប្រសើឡើងនូវកងកម្លាំងរបស់រដ្ឋាភិបាលក្រុងកៀវនឹងធ្វើឱ្យប៉ះពាល់យ៉ាងខ្លាំងដល់ទំនាក់ទំនងរវាងប្រទេសទាំង២។ នេះបើតាមសេចក្តីរាយការណ៍របស់ទីភ្នាក់ងារព័ត៌មានAFP។ បើតាមសេចក្តីថ្លែងការណ៍ពីការិយាល័យរបស់លោក លោកGantz បានប្រាប់ពួកឯកអគ្គរដ្ឋទូតសហភាពអឺរ៉ុបថា«គោលនយោបាយរបស់យើងជាមួយអ៊ុយក្រែនមិនមានការផ្លាស់ប្តូរទេ។ យើងនឹងបន្តគាំទ្រនិងរួបរួមជាមួយប្រទេសលោកខាងលិច ហើយយើងនឹងមិនផ្តល់សព្វាវុធនោះទេ។
២២:៣៩
២០.១០.២០២២
ថ្ងៃព្រហស្បតិ៍ ទី ២០ ខែតុលា៖
- នៅពេលដែលទាហានអ៊ុយក្រែនរុលទៅមុខនៅលើសមរភូមិក្នុងប្រទេសខ្លួននោះ ពួកគេកំពុងចាប់បានរថយន្តយោធា និងអាវុធដែលត្រូវបានបោះបង់ចោលដោយទាហានរុស្ស៊ីរត់គេចខ្លួន ហើយទាហានអ៊ុយក្រែនកំពុងប្រើឧបករណ៍យោធាខ្លះនៃឧបករណ៍ទាំងនោះប្រឆាំងនឹងទាហានឈ្លានពាន។ នេះបើតាមក្រុមអ្នកវិភាគប្រាប់ទីភ្នាក់ងារព័ត៌មាន AFP។ រុស្ស៊ី និងប្រទេសជិតខាងភាគច្រើនប្រើឧបករណ៍ស្រដៀងគ្នាក្នុងសម័យសហភាពសូវៀត ដូច្នេះទាហានអ៊ុយក្រែនជារឿយៗមិនចាំបាច់ហ្វឹកហាត់ប្រើឧបករណ៍យោធាទាំងនោះទេ។ រុស្ស៊ីបានរឹបអូសយកទឹកដីអ៊ុយក្រែនជាច្រើនផ្នែកចាប់តាំងពីការឈ្លានពានតាំងពីចុងខែកុម្ភៈមក។ ក៏ប៉ុន្តែ កងកម្លាំងរបស់រដ្ឋាភិបាលក្រុងកៀវបានទប់ទល់មិនឱ្យរុលទៅមុខខ្លះៗ ហើយចាប់តាំងពីខែសីហាមកកងកម្លាំងអ៊ុយក្រែនបានដណ្តើមកាន់កាប់ទឹកដីដ៏ធំមកវិញនៅភាគឦសាន និងខាងត្បូងប្រទេស។ អ្នកវិភាគ ដែលសុំមិនបញ្ចេញឈ្មោះ ធ្វើការនៅក្រុមហ៊ុនរបស់ចក្រភពអង់គ្លេសឈ្មោះ Janes ដែលធ្វើការផ្នែកវិភាគការស៊ើបការណ៍សម្ងាត់ បាននិយាយថា៖ «អ៊ុយក្រែនបានរឹបអូសយកឧបករណ៍នោះយ៉ាងច្រើន»។ គេពិបាកដឹងពិតប្រាកដណាស់ថា តើឧបករណ៍ចំនួនប៉ុន្មានត្រូវបានរឹបអូសយកនោះ ក៏ប៉ុន្តែក្រុមហ៊ុន Janes បានប៉ាន់ស្មានថា យ៉ាងហោចណាស់មានរថយន្តចំនួន២០០គ្រឿង រថក្រោះ៤៥គ្រឿង រថយន្តទាហានថ្មើរជើងចំនួន៧០គ្រឿង និងកាំភ្លើងធំ៣០គ្រឿងដែរ។
- ប្រធានាធិបតីរុស្ស៊ី លោក Vladimir Putin កាលពីថ្ងៃពុធ បានបញ្ជាឱ្យពលរដ្ឋរុស្ស៊ីទាំងអស់គាំទ្រកិច្ចប្រឹងប្រែងធ្វើសង្គ្រាមនៅក្នុងប្រទេសអ៊ុយក្រែន នៅពេលដែលរដ្ឋបាលនៃតំបន់ Kherson ដែលតែងតាំងដោយរុស្ស៊ី បានប្រុងប្រៀបជម្លៀសមនុស្សនៅតំបន់តែមួយគត់ដែលរដ្ឋាភិបាលក្រុងមូស្គូបានកាន់កាប់អំឡុងការឈ្លានពានរបស់ខ្លួន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ រូបភាពរបស់មនុស្សប្រើប្រាស់ទូកជាច្រើនដើម្បីរត់ចេញពីទីក្រុងភាគខាងត្បូងនោះត្រូវបានផ្សព្វផ្សាយតាមទូរទស្សន៍រដ្ឋរុស្ស៊ី ដែលបានបង្ហាញពីមនុស្សយ៉ាងច្រើនរត់ចេញពីឆ្នេរខាងស្តាំទៅឆ្នេរខាងឆ្វេងនៃទន្លេ Dnipro ខណៈមានការព្យាយាមជម្លៀសជនស៊ីវិល មុនពេលតំបន់នោះក្លាយជាសមរភូមិ។ ប្រធានតំបន់ Kherson ដែលត្រូវបានលើកបន្តុកដោយរុស្ស៊ី បាននិយាយថា មនុស្សប្រហែលពី៥ម៉ឺនទៅ៦ម៉ឺននាក់នឹងត្រូវចាកចេញពីទីកន្លែងនេះក្នុងរយៈពេល៦ថ្ងៃ។ Kherson ជាតំបន់មួយនៃតំបន់៤របស់អ៊ុយក្រែនដែលត្រូវបានទាមទារជាឯកតោភាគីដោយរដ្ឋាភិបាលក្រុងមូស្គូ និងជាកន្លែងដែលលោក Putin បានប្រកាសច្បាប់អាជ្ញាសឹកកាលពីថ្ងៃពុធ។
- កងទ័ពអាកាសរុស្ស៊ីបានធ្វើផែនការហោះយាមល្បាតតាមព្រំដែនប្រទេសបេឡារុសដែលជាសម្ពន្ធមិត្តរបស់ខ្លួននៅថ្ងៃព្រហស្បតិ៍ នៅពេលដែលមានការព្រួយបារម្ភថា ប្រទេសបេឡារុសអាចមានតួនាទីកាន់តែសកម្មនៅក្នុងសង្គ្រាមនៅអ៊ុយក្រែន។ នេះបើតាមការបញ្ជាក់របស់រដ្ឋាភិបាលក្រុង Minsk រាយការណ៍ដោយទីភ្នាក់ងារព័ត៌មាន Reuters។ រុស្ស៊ីបានដាក់ពង្រាយកងទ័ពចំនួន៩ពាន់នាក់ និងឧបករណ៍យោធារាប់រយនៅប្រទេសបេឡារុស ដែលនៅជិតខាង បន្ទាប់ពីលោកប្រធានាធិបតី Alexander Lukashenko បាននិយាយកាលពីសប្តាហ៍មុនថា បេឡារុសបានរងការគំរាមកំហែងពីអ៊ុយក្រែន។
- ក្រសួងការពារជាតិរុស្ស៊ីបានបញ្ជាក់កាលពីថ្ងៃព្រហស្បតិ៍ថា កងទ័ពរបស់ខ្លួនបានបន្តវាយប្រហារលើទីតាំងយោធា និងថាមពលនៅក្នុងប្រទេសអ៊ុយក្រែន រយៈពេល២៤ម៉ោងចុងក្រោយនេះ។ ក្រសួងនេះក៏បាននិយាយដែរថា កងទ័ពរុស្ស៊ីបានវាយបកទៅលើកងទ័ពអ៊ុយក្រែននៅក្នុងតំបន់ Kherson ភាគខាងត្បូង ដែលនៅទីនោះពួកមន្ត្រីលើកបន្តុកដោយរុស្ស៊ីកំពុងជម្លៀសអ្នកស្រុករាប់ពាន់នាក់។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
- ប្រទេសឥណ្ឌាបានចេញសេចក្តីណែនាំកាលពីថ្ងៃពុធ សុំឱ្យពលរដ្ឋចៀសវាងការធ្វើដំណើរទៅកាន់ប្រទេសអ៊ុយក្រែន ដោយលើកហេតុផលថា ស្ថានភាពសន្តិសុខនៅក្នុងប្រទេសនោះកាន់តែយ៉ាប់យ៉ឺន។ ស្ថានទូតឥណ្ឌានៅក្នុងប្រទេសអ៊ុយក្រែនបានបញ្ជាក់នៅក្នុងសេចក្តីថ្លែងការណ៍ដែលបានចេញផ្សាយតាម Twitter ហើយត្រូវបានរាយការណ៍ដោយទីភ្នាក់ងារព័ត៌មាន Reuters ថា «ពលរដ្ឋឥណ្ឌា រួមទាំងនិស្សិតដែលបច្ចុប្បន្ននេះស្ថិតនៅក្នុងប្រទេសអ៊ុយក្រែន ត្រូវចាកចេញឱ្យបានឆាប់រហ័សតាមមធ្យោបាយដែលអាចធ្វើបាន»៕
២២:៥៣
២១.១០.២០២២
ថ្ងៃសុក្រ ទី ២១ ខែតុលា៖
- ប្រធានាធិបតីតួកគីលោក Tayyip Erdogan បានត្រូវបណ្តាញព័ត៌មានដកស្រង់សម្តីមកចុះផ្សាយកាលពីថ្ងៃសុក្រថា លោកមិនឃើញមានឧបសគ្គដើម្បីបន្តកិច្ចព្រមព្រៀងដែលសម្របសម្រួលដោយអង្គការសហប្រជាជាតិដើម្បីអនុញ្ញាតឱ្យនាំចេញគ្រាប់ធញ្ញជាតិរបស់អ៊ុយក្រែនតាមសមុទ្រខ្មៅនោះទេ បន្ទាប់ពីការពិភាក្សាជាមួយសមភាគីរុស្ស៊ីនិងអ៊ុយក្រែនរបស់លោកមក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ បណ្តាញព័ត៌មាន NTV បានដកស្រង់សម្តីលោក Erdogan នៅពេលដែលលោកបានប្រាប់ពួកអ្នកយកព័ត៌មាននៅលើយន្តហោះរបស់លោកដែលវិលត្រឡប់មកពីប្រទេសអាស៊ែបៃហ្សង់វិញថា៖ «មិនមានឧបសគ្គដើម្បីបន្តកិច្ចព្រមព្រៀងនោះទេ។ ខ្ញុំមើល ឃើញការបន្តកិច្ចព្រមព្រៀងនេះនៅក្នុងការចរចាដែលខ្ញុំបានធ្វើជាមួយប្រធានាធិបតីរុស្ស៊ីលោក Putin»។ បណ្តាញព័ត៌មាន NTV ក៏បានដកស្រង់សម្តីលោក Erdogan មកចុះផ្សាយដែរថា គ្រាប់ធញ្ញជាតិនិងស្បៀងអាហារជាង៨លានតោនបានត្រូវនាំចេញនៅក្រោមកិច្ចព្រមព្រៀងដែលបានចុះហត្ថលេខាកាលពីកក្កដា។
- ប្រធានាធិបតីរុស្ស៊ីលោក Vladimir Putin បានបើកចំហសម្រាប់ការចរចាជាមួយប្រទេសអ៊ុយក្រែន ចាប់តាំងពីដំបូងមកម្ល៉េះ ហើយរឿងនេះមិនមានការផ្លាស់ប្តូរអ្វីនោះឡើយ។ នេះបើយោងទៅលើការបញ្ជាក់របស់អ្នកនាំពាក្យវិមានក្រឹមឡាំងលោក Dmitry Peskov ដែលបានថ្លែងប្រាប់ក្រុមអ្នកសារព័ត៌មាននៅថ្ងៃសុក្រនេះ ដោយយោងទៅលើការថ្លែងរបស់ ប្រធានាធិបតីប្រទេសតួកគី លោក Recep Tayyip Erdogan។ នេះបើតាមការចេញផ្សាយរបស់ទីភ្នាក់ងារព័ត៌មាន AP។ ប្រធានាធិបតីតួកគី បាននិយាយថា លោកPutin ហាក់ដូចជាមានការបន្ទន់ឥរិយបទនិងបើកចំហរច្រើនជាងមុនក្នុងការចរចា។ «យើងនៅតែមានសង្ឃឹមជុំវិញរឿងនេះ» ដោយលោកនិយាយយោងទៅដល់លទ្ធភាពនៃការចរចាដើម្បីបញ្ចប់ជម្លោះនៅក្នុងប្រទេសអ៊ុយក្រែន។
- រុស្ស៊ីបានបញ្ជាក់កាលពីថ្ងៃសុក្រថា កងទ័ពអ៊ុយក្រែនបានសម្លាប់មនុស្សយ៉ាងតិចណាស់៤នាក់ ហើយនឹងធ្វើឱ្យរបួសជាង១៣នាក់ទៀតនៅក្នុងការវាយប្រហារដោយកាំជ្រួចមីស៊ីលមួយទៅលើជនស៊ីវិលដែលកំពុងជម្លៀសចេញពីតំបន់ Kherson ដែលត្រួតត្រាដោយរុស្ស៊ី។ មន្ត្រីអ៊ុយក្រែនម្នាក់បានទទួលស្គាល់ការវាយប្រហារនេះ ក៏ប៉ុន្តែ បាននិយាយថា ការណ៍នេះបានកើតមានឡើងបន្ទាប់ពីបម្រាមគោលចរណ៍ស៊ីវិល។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ ពួកអាជ្ញាធរដែលលើកបន្តុបដោយរុស្ស៊ីនៅក្នុងតំបន់ភាគខាងត្បូងប្រទេសអ៊ុយក្រែនដែលរដ្ឋាភិបាលក្រុងមូស្គូបានធ្វើជាឧបសម្ព័ន្ធរបស់ខ្លួនកាលពីខែមុនកំពុងជម្លៀសមនុស្សប្រមាណពី៥ម៉ឺនទៅ៦ម៉ឺននាក់ឆ្លងកាត់ទន្លេ Dnipro មុនពេលការវាយបករបស់អ៊ុយក្រែនដែលត្រូវបានគេរំពឹងទុក។
- ប្រធានាធិបតីអ៊ុយក្រែនលោក Volodymyr Zelenskyy បានអំពាវនាវដល់ប្រទេសលោកខាងលិច ឱ្យព្រមានដល់ប្រទេសរុស្ស៊ីកុំឱ្យបំផ្ទុះទំនប់ទឹកដ៏ធំមួយ ដែលនឹងធ្វើឱ្យលិចលង់នៅតំបន់ជាច្រើននៅភាគខាងត្បូងអ៊ុយក្រែន ខណៈដែលកងកម្លាំងរបស់លោក កំពុងត្រៀមខ្លួនដើម្បីរុញច្រានកងកម្លាំងរុស្ស៊ីឱ្យចេញពីតំបន់ Kherson ដែលជាផ្នែកមួយនៃការប្រយុទ្ធដ៏សំខាន់បំផុតនៅក្នុងសមរភូមិនោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ នៅក្នុងការថ្លែងសុន្ទរកថាតាមទូរទស្សន៍ លោក Zelenskyy បាននិយាយថា កងកម្លាំងរុស្ស៊ីបានបង្កប់គ្រឿងផ្ទុះជាច្រើនគ្រាប់នៅក្នុងទំនប់ទឹក Nova Kakhovka ដែលជាទំនប់ស្តុកទឹកធំមួយ សម្រាប់ការប្រើប្រាស់នៅក្នុងតំបន់ភាគខាងត្បូងអ៊ុយក្រែន ហើយប្រទេសរុស្ស៊ីមានគម្រោងនឹងបំផ្ទុះទំនប់ទឹកនេះ ដើម្បីបិទបាំងការដកថយរបស់ពួកគេក្នុងសមរភូមិប្រយុទ្ធ។
- ប្រទេសរុស្ស៊ីបានបញ្ជូនកងទ័ពជាច្រើនពាន់នាក់ដែលទើបជ្រើសរើសថ្មី ដើម្បីពង្រឹងការការពាររបស់ខ្លួននៅក្នុងតំបន់ Kherson ភាគខាងត្បូងអ៊ុយក្រែន ដែលនៅទីនោះកងកម្លាំងអ៊ុយក្រែន កំពុងមានប្រៀបយ៉ាងខ្លាំងក្នុងការរុលទៅមុខ នៅក្នុងការប្រយុទ្ធវាយបកដើម្បីយកទឺកដី ដែលកាន់កាប់ដោយកងកម្លាំងរុស្ស៊ីមកវិញ។ នេះបើតាមការផ្សាយរបស់វិទ្យុអឺរ៉ុបសេរី។ មានកងទ័ពរុស្ស៊ីថ្មីៗរហូតដល់ចំនួន២ពាន់នាក់ បានមកដល់តំបន់ Kherson ដើម្បីជំនួសនិងបំពេញកន្លែងកងទ័ពចាស់ និងពង្រឹងអង្គភាពយោធានៅលើសមរភូមិជួរមុខ។ នេះបើតាមសេចក្តីថ្លែងការណ៍មួយរបស់នាយសេនាធិការយោធាអ៊ុយក្រែននៅថ្ងៃសុក្រនេះ។
- ជាង៣០ឆ្នាំបន្ទាប់ពីការដួលរលំវាំងននដែកមក ប្រទេសហ្វាំងឡង់មានគម្រោងកសាងរបងលួសបន្លានៅតាមបណ្តោយព្រំដែនរបស់ខ្លួនជាមួយរុស្ស៊ីដែលបែងចែកតំបន់ខាងកើតនិងខាងលិចបន្ទាប់ពីសង្គ្រាមនៅក្នុងប្រទេសអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ សមាជិកដែលគេរំពឹងថានឹងចូលក្នុងអង្គការអូតង់នេះ បានប្រកាសនៅសប្តាហ៍នេះពីផែនការដែលមានការគាំទ្រយ៉ាងខ្លាំងពីសភាដើម្បីជំនួសរបងឈើរបស់ខ្លួនដែលធ្វើឡើងដើម្បីបញ្ឈប់សត្វពាហនៈកុំឱ្យឆ្លងកាត់នៅតាមបណ្តោយព្រំដែនដែលមានប្រវែង១ពាន់៣រយគីឡូម៉ែត្រដោយដាក់របងលួសបន្លាដើម្បីកុំឱ្យជនជាតិរុស្ស៊ីនិងជនចំណាកស្រុកចូលក្នុងប្រទេសហ្វាំងឡង់។ អ្នកស្រីនាយកមន្ត្រី Sanna Marin បានប្រាប់ពួកអ្នកយកព័ត៌មាននៅរដ្ឋធានីហែលស៊ិនគីថា «យើងសង្ឃឹមថា ការងារនេះអាចចាប់ផ្តើមបានឆាប់រហ័សទៅតាមលទ្ធភាពដែលអាចធ្វើបាន»។ ហ្វាំងឡង់បានឃើញជនចំណាកស្រុករុស្ស៊ីដ៏ច្រើនក្នុងខែកញ្ញាបន្ទាប់ពីការបញ្ជារបស់ប្រធានាធិបតីរុស្ស៊ីលោក Vladimir Putin ឱ្យកេណ្ឌកងទ័ពមុនពេលខ្លួនរឹតត្បិតច្រកចេញចូលរបស់ខ្លួន។
- ប្រធានាធិបតីសហរដ្ឋអាមេរិកលោក Joe Biden កាលពីថ្ងៃព្រហស្បតិ៍បានរិះគន់គូប្រជែងខាងគណបក្សសាធារណរដ្ឋចំពោះការស្នើថា ថវិការបស់សហរដ្ឋអាមេរិកសម្រាប់ប្រទេសអ៊ុយក្រែនអាចត្រូវកាត់បន្ថយបន្ទាប់ពីការបោះឆ្នោតសភាពាក់កណ្តាលអាណត្តិនៅខែក្រោយនេះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ លោកប្រធានាធិបតី Biden បាននិយាយនៅក្នុងយុទ្ធនាការឃោសនាបោះឆ្នោតមួយនៅក្នុងរដ្ឋ Pennsylvania ថា៖ «ពួកគេបាននិយាយថា ប្រសិនបើពួកគេឈ្នះ ពួកគេមិនទំនងផ្តល់ថវិកា បន្តផ្តល់ថវិកាដល់អ៊ុយក្រែនទេ»។ លោកប្រធានាធិបតីនិយាយទៀតថា «ជនទាំងនោះមិនយល់។ បញ្ហានោះធំជាងអ៊ុយក្រែនទៅទៀត។ វាជាបញ្ហាអឺរ៉ុបខាងកើត។ វាជាបញ្ហាអង្គការអូតង់។ វាប្រាកដជាមានផលវិបាកធ្ងន់ធ្ងរណាស់»។ លោក Biden និយាយទៀតថា៖ «ពួកគេមិនយល់ពីគោលនយោបាយការបរទេសអាមេរិក»។ មន្ត្រីជាន់ខ្ពស់ខាងគណបក្សសាធារណរដ្ឋលោក Kevin McCarthy បាននិយាយកាលពីថ្ងៃអង្គារថា ប្រសិនបើគណបក្សរបស់លោកធ្វើឱ្យជឿនលឿនខ្លាំងនៅក្នុងការបោះឆ្នោតពាក់កណ្តាលអាណត្តិដូចការរំពឹងទុក ខ្លួននឹងមិនផ្តល់ថវិកាដល់អ៊ុយក្រែនដែលហែកហួរដោយសង្គ្រាមនោះទេ។
- ប្រទេសតួកគីបាននិយាយកាលពីថ្ងៃសុក្រថា ការលុបចោលការដាក់ទណ្ឌកម្មរបស់ប្រទេសលោកខាងលិចលើប្រទេសនានារួមទាំងប្រទេសអ៊ីរ៉ង់និងវ៉េណេស៊ុយអេឡានឹងបន្ធូរបន្ថយវិបត្តិថាមពលសាកលលោកដែលបណ្តាលមកពីការឈ្លានពានរបស់រុស្ស៊ីលើអ៊ុយក្រែន។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន AFP។ វ៉េណេស៊ុយអេឡាបានរងការដាក់ទណ្ឌកម្មការលក់ប្រេងពីសហរដ្ឋអាមេរិកចាប់តាំងពីឆ្នាំ២០១៩មក ហើយអ៊ីរ៉ង់បានស្ថិតក្រោមការដាក់ទណ្ឌកម្មរបស់សហរដ្ឋអាមេរិកនៅពេលដែលការចរចារវាងរដ្ឋាភិបាលក្រុងតេហេរ៉ង់និងរដ្ឋាភិបាលក្រុងវ៉ាស៊ីនតោនអំពីការធ្វើឱ្យមានកិច្ចព្រមព្រៀងនុយក្លេអ៊ែរឆ្នាំ២០១៥ ឡើងវិញបានជាប់គាំង។
- នៅថ្ងៃសុក្រនេះ ប្រទេសអ៊ីរ៉ង់បានជូនដំណឹងដល់ពលរដ្ឋរបស់ខ្លួនមិនឱ្យទៅប្រទេសអ៊ុយក្រែន និងបានប្រាប់ដល់ពលរដ្ឋអ៊ីរ៉ង់ដែលកំពុងស្ថិតនៅក្នុងប្រទេសអ៊ុយក្រែន ឱ្យចាកចេញពីប្រទេសនេះ។ នេះបើតាមការផ្សព្វផ្សាយរបស់ទីភ្នាក់ងារព័ត៌មានផ្លូវការប្រទេសអ៊ីរ៉ង់។ ការប្រកាសនេះ ត្រូវបានធ្វើឡើងមួយថ្ងៃបន្ទាប់ពីសហរដ្ឋអាមេរិក បានចោទប្រកាន់អ៊ីរ៉ង់ថាបានជួយដល់ប្រទេសរុស្ស៊ី ក្នុងការប្រើប្រាស់យន្តហោះដ្រូននៅក្នុងប្រទេសអ៊ុយក្រែននោះ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ សេចក្តីជូនដំណឹងរបស់ក្រសួងការបរទេសអ៊ីរ៉ង់ មិនបាននិយាយយោងទៅលើការចោទប្រកាន់របស់សហរដ្ឋអាមេរិកនោះឡើយ។ សេចក្តីជូនដំណឹងនេះ បានផ្តល់លេខទូរស័ព្ទរបស់ស្ថានទូតអ៊ីរ៉ង់ក្នុងរដ្ឋធានីកៀវ ដើម្បីឱ្យពលរដ្ឋរបស់ខ្លួនទាក់ទងដើម្បីសាកសួរព័ត៌មាន។
- ប្រធានាធិបតីប្រទេសតួកគីលោក Tayyip Erdogan ត្រូវបានសារព័ត៌មានស្រង់សម្តីមកចុះផ្សាយនៅថ្ងៃសុក្រនេះថា លោកនឹងជួបជាមួយនាយករដ្ឋមន្ត្រីប្រទេសស៊ុយអែតលោក Ulf Kristersson ដើម្បីពិភាក្សាគ្នារឿងការសុំចូលជាសមាជិករបស់អង្គការអូតង់របស់ប្រទេសនេះ ក៏ដូចជាការពិភាក្សាទៅលើការធ្វើបត្យាប័នមនុស្សមួយចំនួន ដែលរដ្ឋាភិបាលក្រុងអង់ការ៉ា គិតថាជាភេរវជននោះ។ នេះបើតាមទីភ្នាក់ងារព័ត៌មាន Reuters។ លោក Erdogan ក៏បាននិយាយផងដែរថាលោក Kristersson ដែលទើបតែត្រូវបានតែងតាំងក្នុងពេលថ្មីៗនេះ ជានាយករដ្ឋមន្ត្រីនៃប្រទេសស៊ុយអែតនោះ បានតាំងចិត្តថានឹងប្រយុទ្ធប្រឆាំងនឹងអំពើភេរវកម្ម។ នេះបើតាមការផ្សាយរបស់ទូរទស្សន៍ NTV របស់ប្រទេសតួកគី។