លោក Blinken៖ បស្ចិមប្រទេសមិនចង់ធ្វើសង្គ្រាមជាមួយរុស្ស៊ី ហើយបានតាំងចិត្តជួយអ៊ុយក្រែន
នៅឯជំនួបនៅថ្ងៃសុក្រនេះជាមួយដៃគូអង្គការអូតង់ រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា៖
«យើងមិនស្វះស្វែងធ្វើសង្គ្រាមឬជម្លោះជាមួយរុស្ស៊ីទេ។ នៅពេលជាមួយគ្នានេះយើងចាំបាច់ធ្វើឲ្យប្រាកដថាមិនមានការយល់ច្រឡំអំពីការតាំងចិត្តរបស់យើងដើម្បីការពារសម្ព័ន្ធមិត្តរបស់យើង»៕ (Washington Post)
- ដោយ ម៉ែន គឹមសេង
កម្ពុជាចូលរួមស្នើសេចក្តីសម្រេចចិត្តអ.ស.ប ថ្កោលទោសសង្គ្រាមនៅអ៊ុយក្រែន
ប្រទេសកម្ពុជាបានចូលរួមជាមួយនឹងប្រទេសជាច្រើននៅលើពិភពលោកដែលថ្កោលទោសការឈ្លានពានរបស់រុស្ស៊ីលើប្រទេសអ៊ុយក្រែន និងទទូចឲ្យដកកងទ័ពចេញដើម្បីឈានទៅការចរចាគ្នាបញ្ចប់ជម្លោះ។ លោកនាយករដ្ឋមន្ត្រី ហ៊ុន សែន បានពន្យល់ថា សង្គ្រាមឈ្លានពានដែលមានអាយុកាល១សប្តាហ៍មកនេះ គឺផ្ទុយពីគោលនយោបាយការបរទេសកម្ពុជាដែលមិនគាំទ្រសង្គ្រាមនិងការបំបែករដ្ឋ។ ថ្នាក់ដឹកនាំគណបក្សសង្គ្រោះជាតិក៏យល់ថា ការចូលឈ្លានពានប្រទេសជិតខាងត្រូវតែទទួលការថ្កោលទោស។ ពីរដ្ឋធានីវ៉ាស៊ីនតោន លោកម៉ែន គឹមសេងនៃវីអូអេរាយការណ៍ជូនតាមកម្មវិធី«ប្រភពច្បាស់ការណ៍» (Primary Sources)៕
ការបាញ់ផ្តក់របស់រុស្ស៊ីបណ្តាលឲ្យឆេះរោងចក្រនុយក្លេអ៊ែរនៅអ៊ុយក្រែន
កងកម្លាំងរុស្ស៊ី បានបាញ់ផ្តក់ដាក់រោងចក្រនុយក្លេអ៊ែរ Zaporizhzhia ដែលជារោងចក្រនុយក្លេ អ៊ែរដ៏ធំបង្អស់មួយរបស់អ៊ុយក្រែន ហើយបានបណ្តាលឲ្យឆេះអគារនៅក្នុងបរិវេណរោងចក្រនេះ។ នេះបើតាមការបញ្ជាក់របស់ក្រុមអ្នកសង្គ្រោះបន្ទាន់របស់អ៊ុយក្រែននៅថ្ងៃសុក្រនេះ។
កាលពីដំបូង អភិបាលក្រុង Enerhoda ដែលជាក្រុងនៅក្បែនោះ បាននិយាយថា រោងចក្រនោះបានឆេះ។ ក៏ប៉ុន្តែ ភ្លាមៗក្រោយមក នាយករោងចក្រនោះ បានប្រាប់ទូរទស្សន៍ប៉ុស្តិ៍ ២៤ ថា អគ្គិភ័យបានចាប់ផ្តើមឆេះខាងក្រៅអាគារហើយថា សន្តិសុខហាក់ដូចជាត្រូវបានស្តាររោងចក្រនោះឡើងវិញ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
Enerhoda ជាទីក្រុងផលិតថាមពលដ៏សំខាន់មួយនៅទន្លេ Dnieper ដែលមានប្រវែងជិត ៧០០ គីឡូម៉ែត្រភាគអាគ្នេយ៍រដ្ឋធានីកៀវ។ រោងចក្រនោះ ផលិតថាមពលប្រហែលចំនួន ២៥% សម្រាប់ប្រទេសអ៊ុយក្រែន។
ប្រធានាធិបតីសហរដ្ឋអាមេរិកលោក Joe Biden បាននិយាយជាមួយប្រធានាធិបតីអ៊ុយក្រែនលោក Volodymyr Zelenskyy ហើយបានទទួលព័ត៌មានថ្មីៗស្តីពីការឆេះរោងចក្រនុយក្លេអ៊ែរនេះ។ នេះបើតាមសេចក្តីថ្លែងការណ៍របស់សេតវិមានដែលបានចេញផ្សាយកាលពីយប់ថ្ងៃព្រហស្បតិ៍ម្សិលមិញ។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
- ដោយ VOA
រុស្ស៊ីបញ្ជាក់ពីចំនួនទាហានរបស់ខ្លួនដែលបានស្លាប់និងរងរបួស
ជាលើកដំបូងនៅថ្ងៃព្រហស្បតិ៍ ក្រសួងការពារជាតិរុស្ស៊ីបានបញ្ជាក់ថា ទាហានរបស់ខ្លួនចំនួន ៤៩៨ នាក់ បានស្លាប់ និងជាង ១.៥៩៧ នាក់ បានរងរបួសនៅក្នុងការប្រយុទ្ធរបស់ខ្លួនក្នុងប្រទេសអ៊ុយក្រែន។ នេះបើយោងតាមសេចក្តីរាយការណ៍របស់វិទ្យុជាតិអាមេរិក (National Pubic Radio)។
ករណីស្លាប់និងរងរបួសរបស់ទាហានរុស្ស៊ីបង្ហាញឲ្យឃើញថា ការប្រយុទ្ធរបស់រុស្ស៊ីដើម្បីផ្តួលរំលំរដ្ឋាភិបាលអ៊ុយក្រែនដែលរដ្ឋាភិបាលរុស្ស៊ីបានចាត់ទុកថាជា «ប្រតិបត្តិការយោធាពិសេស» នេះ ត្រូវបានប្រឈមនឹងការតទល់យ៉ាងខ្លាំងក្លាពីកងកម្លាំងការពារជាតិអ៊ុយក្រែននិងជនស៊ីវិលផងដែរ។
មកទល់ពេលនេះ សេចក្តីរាយការណ៍របស់យោធារុស្ស៊ីផ្តោតតែលើមូលដ្ឋានទ័ព សព្វាវុធ និងសម្ភាៈយោធារបស់ខ្លួនដែលត្រូវបានបំផ្លាញ ខណៈរដ្ឋាភិបាលរុស្ស៊ីកំពុងបង្ក្រាបលើសេចក្តីរាយការណ៍នានាដែលពណ៌នាសកម្មភាពយោធារបស់ខ្លួនថា ជាការបង្កសង្គ្រាម ឬការឈ្លានពាន។
សារព័ត៌មាន CNN បានរាយការណ៍ថា លោក Dmitry Peskov អ្នកនាំពាក្យរដ្ឋាភិបាលរុស្ស៊ី បានថ្លែងជាសាធារណៈនៅថ្ងៃព្រហស្បតិ៍អំពី «ភាពទុក្ខសោក» ចំពោះការស្លាប់និងការរងរបួសរបស់ទាហានរុស្ស៊ី នៅក្នុងការឈ្លានពានលើអ៊ុយក្រែន៕