- ដោយ VOA
សហរដ្ឋអាមេរិកប្រកាសដាក់ទណ្ឌកម្មបន្ថែមលើក្រុមអភិជនរុស្ស៊ី
នៅថ្ងៃព្រហស្បតិ៍ រដ្ឋាភិបាលអាមេរិកបានដាក់ទណ្ឌកម្មជាបន្តបន្ទាប់បន្ថែមទៀតលើក្រុមដែលសិ្នទ្ធបំផុតនឹងលោក Vladimir Putinប្រធានាធិបតីរុស្ស៊ី។
ក្នុងចំណោមអ្នកទាំងនោះរួមមានលោក Alisher Usmanov ដែលជាមហាសេដ្ឋីម្នាក់របស់រុស្ស៊ី។ ដោយឡែកអាជ្ញាធរអាល្លឺម៉ង់បានរឹបអូសយកនាវាជិះកម្សាន្តប្រវែងប្រមាណ ១៥៦ ម៉ែត្រ ដែលមានតម្លៃជាទឹកប្រាក់ប្រហែល ៦០០លានដុល្លារអាមេរិករបស់មហាសេដ្ឋីរុស្ស៊ីរូបនេះ។
ក្រោមទណ្ឌកម្មនេះ យន្តហោះឯកជនរបស់លោក ក៏អាចនឹងត្រូវរឹបអូសផងដែរ។ ទណ្ឌកម្មនេះក៏ហាមឃាត់មិនឲ្យអភិជនរុស្ស៊ីជាង ៥០ នាក់ ធ្វើដំណើរចូលសហរដ្ឋអាមេរិកជាដាច់ខាត៕
- ដោយ VOA
រុស្ស៊ីចូលដល់តំបន់ភាគខាងត្បូងនៃប្រទេសអ៊ុយក្រែននៅថ្ងៃព្រហស្បតិ៍
ការប្រយុទ្ធរបស់ទាហានរុស្ស៊ីដើម្បីត្រួតត្រាទីក្រុងកៀវរដ្ឋធានីរបស់ប្រទេសអ៊ុយក្រែន ត្រូវបានរងការតទល់វិញពីទាហានអ៊ុុយក្រែនជាបន្តបន្ទាប់ ក៏ប៉ុន្តែទាហានរុស្ស៊ីត្រូវបានគេរាយការណ៍ថាបានចូលដល់តំបន់ភាគខាងត្បូងប្រទេសអ៊ុយក្រែន ដើម្បីព្យាយាមបំបែកតំបន់ដែលតភ្ជាប់ប្រទេសអ៊ុយក្រែនទៅនឹងសមុទ្រខ្មៅ (Black Sea) និងសមុទ្រ Azov។
បន្ទាប់ពីមានការអះអាងខុសៗគ្នាកាលពីប៉ុន្មានថ្ងៃមុន នៅថ្ងៃព្រហស្បតិ៍នេះ មន្ត្រីរដ្ឋាភិបាលអ៊ុយក្រែនក្នុងតំបន់និងយោធារុស្ស៊ី បានបញ្ជាក់ថា រុស្ស៊ីបានចូលត្រួតត្រាទីក្រុង Khersonជាទីក្រុងដំបូងគេដែលធ្លាក់ក្រោមការកាន់កាប់របស់រុស្ស៊ី ចាប់តាំងពីរុស្ស៊ីបានចូលឈ្លានពានអ៊ុយក្រែននៅថ្ងៃទី ២៤ ខែកុម្ភៈមក។ មន្ត្រីការពារប្រទេសរបស់សហរដ្ឋអាមេរិកមួយរូបបានឲ្យដឹងថា រដ្ឋាភិបាលអាមេរិកមិនអាចបញ្ជាក់លើហេតុការណ៍នេះបាននៅឡើយទេ៕
លទ្ធផលបឋមពីកិច្ចចរចាដើម្បីសន្តិភាពលើកទី ២ រវាងរុស្ស៊ីនិងអ៊ុយក្រែន
រុស្ស៊ីនិងអ៊ុយក្រែនបានជួបចរចាគ្នាជាលើកទី ២ នៅប្រទេសបេឡារុស កាលពីថ្ងៃព្រហស្បតិ៍ ហើយបានស្រុះស្រួលគ្នាបង្កើតតំបន់ច្រកចេញចូលមួយដើម្បីកិច្ចការមនុស្សធម៌នៅក្នុងតំបន់ត្រូវឲ្យមានបទឈប់បាញ់គ្នា ដើម្បីអនុញ្ញាតឲ្យពលរដ្ឋស៊ីវិលគេចខ្លួនដោយសុវត្ថិភាពចេញពីតំបន់ប្រយុទ្ធគ្នា៕
ការប្រឆាំងតបតដ៏ខ្លាំងក្លារបស់លោក Zelenskyy ធ្វើឲ្យលោកក្លាយជាឥស្សរជនល្បីក្នុងពិភពលោក
ប្រធានាធិបតីអ៊ុយក្រែន លោក Volodymyr Zelenskyy បានក្លាយជាតួរអង្គដ៏សំខាន់មួយនៅលើឆាកអន្តរជាតិ នៅក្នុងរយៈពេលប៉ុន្មានថ្ងៃ ចាប់តាំងពីកងកម្លាំងរុស្ស៊ីបានឈ្លានពានចូលប្រទេសរបស់លោក ដោយលោកបានប្រកាសពីគោលជំហរបន្តស្ថិតនៅទីក្រុងកៀវ បើទោះបីជាទាហានរុស្ស៊ីរាប់ម៉ឺននាក់ឡោមព័ទ្ធរដ្ឋធានីនេះក៏ដោយ។
ជាការឆ្លើយតបគួរឲ្យកត់សម្គាល់ទៅនឹងសំណើរបស់សហរដ្ឋអាមេរិក ក្នុងការជម្លៀសលោកនិងក្រុមគ្រួសារចេញពីអ៊ុយក្រែន បន្ទាប់ពីមានការឈ្លានពានបានចាប់ផ្ដើម លោកថា «ការវាយប្រយុទ្ធគ្នាកើតឡើងនៅទីនេះ ខ្ញុំត្រូវការគ្រាប់រំសេវ មិនមែនដំណើរចាកចេញនោះទេ»។ ពាក្យសម្ដីទាំងនេះហើយដែលធ្វើឲ្យលោកក្លាយជានិម្មិតសញ្ញានៃការប្រឆាំងដ៏ខ្លាំងក្លារបស់អ៊ុយក្រែនទៅលើទាហានឈ្លានពានរុស្ស៊ី។
ការថ្លែងតាមវីដេអូឃ្លីបមួយរបស់លោក Zelenskyy ថតចេញពីវិថីមួយនៃរដ្ឋធានីអ៊ុយក្រែន ដែលកំពុងស្ថិតក្រោមការគំរាមកំហែងនិងការអំពាវនាវរបស់លោកទៅកាន់សហភាពអឺរ៉ុប និងស្ថាប័នអន្តរជាតិផ្សេងទៀតឲ្យជួយគាំទ្រដល់ការរើបម្រះនៃប្រទេសរបស់លោកចេញពីការឈ្លានពានរបស់រុស្ស៊ី បានធ្វើឲ្យលោកល្បីល្បាញពាសពេញសាកលលោក។
ប៉ុន្តែថ្មីៗមុនពេលនេះ អតីតតារាសម្ដែងនិងកំប្លែងរូបនេះ មិនមានភាពល្បីល្បាញនៅក្រៅប្រទេសកំណើតរបស់លោកនោះទេ។ លោក Zelenskyy ដែលមានអាយុ ៤៤ ឆ្នាំ បានចូលកាន់តំណែងនៅរដូវផ្ការីក ក្នុងឆ្នាំ ២០១៩ ដោយទទួលបានសន្លឹកបោះឆ្នោតគាំទ្រ ៧៣.២ ភាគរយ យកឈ្នះទៅលើអតីតប្រធានាធិបតីលោក Petro Poroshenko។
ការជាប់ឆ្នោតរបស់លោក គឺជាករណីកើតចេញពីសិល្បៈច្នៃប្រឌិតនៃជីវិតលើលោកនេះពិតៗដោយសារតែមុនពេលបោះឆ្នោត លោក Zelenskyy មានភាពល្បីល្បាញ នៅពេលលោកបានសម្ដែងនិងដើរតួជាគ្រូបង្រៀនប្រវត្តិសាស្ត្រម្នាក់ ហើយត្រូវបានជាប់ឆ្នោតជាប្រធានាធិបតីអ៊ុយក្រែននៅក្នុងកម្មវិធីទូរទស្សន៍ដ៏ល្បីមួយឈ្មោះថា «អ្នកបម្រើពលរដ្ឋ»។
គោលគំនិតនៃកម្មវិធីទូរទស្សន៍នោះ បានធ្វើឲ្យតួអង្គលោក Zelenskyy កើនប្រជាប្រិយភាព បន្ទាប់ពីវីដេអូមួយបានបង្ហាញរូបលោកស្រែកឡូឡាប្រឆាំងនឹងអំពើពុករលួយនៅអ៊ុយក្រែន។ កាលពីឆ្នាំ ២០១៨ គណបក្សនយោបាយថ្មីមួយនៅអ៊ុយក្រែន ដែលដាក់ឈ្មោះទៅតាមឈ្មោះកម្មវិធីទូរទស្សន៍របស់លោក Zelenskyy បានប្រកាសតែងតាំងតារាទូរទស្សន៍រូបនេះឲ្យធ្វើជាបេក្ខជនប្រធានាធិបតី នៅលើវេទិកាប្រឆាំងនឹងអំពើពុករលួយ ដែលស្រដៀងទៅនឹងតួអង្គប្រធានាធិបតីនៅក្នុងសាច់រឿងនោះដែរ។
លោក Zelenskyy មានដើមកំណើតនៅភាគខាងកើតនៃប្រទេសអ៊ុយក្រែន។ លោកកើតក្នុងទីក្រុង Kryvyi Rih ដែលជាទីក្រុងមួយនៅតំបន់និយាយភាសារុស្ស៊ី នៅប៉ែកកណ្ដាលភាគខាងត្បូងនៃអ៊ុយក្រែន ដែលកាលនោះជាផ្នែកមួយនៃសហភាពសូវៀត។
អានព័ត៌មានលម្អិតតាមរយៈតំណភ្ជាប់ខាងក្រោមនេះ៖
