ការអនុម័តតែងតាំងចៅក្រមស្ត្រីស្បែកខ្មៅម្នាក់ជាចៅក្រមតុលាការកំពូលត្រូវបានអបអរសាទរ

សេតវិមាន — ទើបតែត្រូវបានអនុម័តឲ្យក្លាយជាចៅក្រមតុលាការកំពូល លោកស្រី Ketanji Brown Jackson បានថ្លែងអំពីការតែងតាំងដ៏ប្រវត្តិសាស្ត្រនេះ នៅក្នុងពិធីអបអរសាទរមួយកាលពីរសៀលថ្ងៃសុក្រ ទី ៨ ខែមេសា នៅបរិវេណវាលស្មៅខាងត្បូងនៃសេតវិមាន។

លោកស្រី Jackson ថ្លែងថា៖ «យើងបានធ្វើដំណើរដ៏វែងឆ្ងាយទៅកាន់ការការពារសហភាពរបស់យើង។ នៅក្នុងគ្រួសារខ្ញុំ យើងបានចំណាយពេលតែមួយជំនាន់ប៉ុណ្ណោះ ដើម្បីធ្វើដំណើរពីជំនាន់បែងចែកវណ្ណៈ ទៅកាន់តុលាការកំពូលនៃសហរដ្ឋអាមេរិក»។

លោកស្រី Jackson ជាស្ត្រីអាមេរិកាំងដើមកំណើតអាហ្រ្វិកដំបូងគេបង្អស់ដែលបានក្លាយជាចៅក្រមមួយរូបក្នុងចំណោមចៅក្រម ៩ រូប នៃតុលាការកំពូលនៅសហរដ្ឋអាមេរិក និងជាចៅក្រមស្បែកខ្មៅទី ៣ នៅក្នុងប្រវត្តិសាស្ត្រនៃតុលាការកំពូលអាមេរិក។ លោកស្រីបានកត់សម្គាល់អំពីផ្លូវដ៏វែងឆ្ងាយដែលស្ត្រីអាមេរិកាំងដើមកំណើតអាហ្វ្រិកម្នាក់ បានកាន់តំណែងជាចៅក្រមក្នុងតុលាការដ៏ជាទីគោរពនេះ។

ដោយមានការទះដៃអបអរសាទរពីអ្នកចូលរួម លោកស្រី Jackson បានថ្លែងថា៖ «យើងបានចំណាយពេល ២៣២ ឆ្នាំ និងការតែងតាំងពីមុនៗចំនួន ១១៥ លើកដើម្បីឱ្យមានស្ត្រីស្បែកខ្មៅម្នាក់ ត្រូវបានជ្រើសតាំងជាចៅក្រមតុលាការកំពូលសហរដ្ឋអាមេរិក។ តែយើងធ្វើបានសម្រេចហើយ។ យើងទាំងអស់គ្នា យើងទាំងអស់គ្នា យើងធ្វើបានសម្រេចសមិទ្ធផលនេះហើយ»។

ដោយមានការរំភើបចិត្ត លោកស្រី Jackson បានដកស្រង់ពាក្យសម្តីរបស់កវីនិពន្ធលោកស្រី Maya Angelou នៅក្នុងសុន្ទរកថារបស់លោកស្រីថា៖ «នាំយកអំណោយដែលបុព្វបុរសបស់ខ្ញុំបានផ្តល់ឱ្យ ខ្ញុំជាក្តីប៉ងប្រាថ្នានិងជាក្តីសង្ឃឹមរបស់ទាសករ»។

លោកស្រីចៅក្រម Ketanji Brown Jackson ថ្លែងសុន្ទរកថាក្រោយការអនុម័តរបស់ព្រឹទ្ធសភាតែងតាំងលោកស្រីជាចៅក្រមម្នាក់នៃតុលាការកំពូលសហរដ្ឋអាមេរិក នៅសេតវិមាន រដ្ឋធានីវ៉ាស៊ីនតោន កាលពីថ្ងៃសុក្រ ទី ៨ ខែមេសា ឆ្នាំ ២០២២។

លោកប្រធានាធិបតី Joe Biden និងលោកស្រីអនុប្រធានាធិបតី Kamala Harris បានអមលោកស្រី Jackson ដើម្បីអបអរសាទរការកាន់តំណែងរបស់លោកស្រី ជាចៅក្រមរបស់តុលាការកំពូល មួយថ្ងៃក្រោយពីព្រឹទ្ធសភាអាមេរិកបានបោះឆ្នោតដោយ ៥៣ សំឡេងគាំទ្រ ទល់នឹង ៤៧ សំឡេងជំទាស់ ក្នុងការអនុម័តការតែងតាំងរបស់លោកស្រី Jackson។

លោក Biden ដែលបានធ្វើការឃោសនាបោះឆ្នោតដោយសន្យាថានឹងស្នើបេក្ខជនជាស្ត្រីស្បែកខ្មៅម្នាក់សម្រាប់តំណែងជាចៅក្រុមតុលាការកំពូល បានកត់សម្គាល់អំពីដំណើរការអនុម័តការតែងតាំងដ៏លំបាករបស់លោកស្រី Jackson ដែលមានការគាំទ្រពីសមាជិកសភាមកពីគណបក្សសាធារណរដ្ឋតែមួយក្រុមតូចប៉ុណ្ណោះ។

លោកប្រធានាធិបតីបានមានប្រសាសន៍ថា៖ «ខ្ញុំបានដឹងថា បុគ្គលដែលខ្ញុំបានស្នើឈ្មោះទៅ នឹងត្រូវឆ្លងកាត់ដំណើរការអនុម័តតែងតាំងដ៏ឈឺចាប់និងដ៏លំបាកមួយ។ តែខ្ញុំត្រូវតែនិយាយប្រាប់អស់លោកអ្នកថា អ្វីដែលលោកស្រីចៅក្រម Jackson បានឆ្លងកាត់ គឺលើសពីនេះទៅទៀត។ លោកស្រីបានឆ្លងកាត់ការប្រើពាក្យសម្តីបែបវាយប្រហារ កំហឹង ការនិយាយបង្អាក់ជាច្រើនលើកជាច្រើនសារ ការអះអាងនិងការចោទប្រកាន់ដ៏ថោកទាប និងគ្មានមូលដ្ឋានជាទីបំផុត»។

នៅក្នុងដំណើរការអនុម័តតែងតាំងនោះ សមាជិកសភាមកពីគណបក្សសាធារណរដ្ឋខ្លះបានព្យាយាមបង្ហាញថា លោកស្រី Jackson ជាចៅក្រមដែលអត់ឱនដល់ឧក្រិដ្ឋជនថតរូបអាសអាភាសរបស់កុមារ។

សមាជិកព្រឹទ្ធសភាមកពីគណបក្សសាធារណរដ្ឋតែបីនាក់ប៉ុណ្ណោះគឺ លោកស្រី Susan Collins លោកស្រី Lisa Murkowski និងលោក Mitt Romney បានបោះឆ្នោតយល់ព្រមអនុម័តការតែងតាំងចៅក្រមអាយុ ៥១ឆ្នាំ រូបនេះ។ លោកស្រី Marjorie Taylor Greene ដែលជាញឹកញយជាសមាជិកសភាតំណាងរាស្ត្រដ៏ចម្រូងចម្រាស់ម្នាក់នៃក្រុមអភិរក្សនិយមជ្រុលនៅក្នុងគណបក្សសាធារណរដ្ឋ បានថ្កោលទោសសហការីរបស់លោកស្រី ដែលបានគាំទ្រលោកស្រី Jackson ថា «លម្អៀងទៅលើជនបំពានផ្លូវភេទលើកុមារ»។

លោក Biden បានមានប្រសាសន៍ថា នៅពេលមានការវាយប្រហារទាំងនេះ លោកស្រី Jackson នៅតែមានឥរិយាបថសមរម្យ ស្រគត់ស្រគំ មានការអត់ធ្មត់និងការទប់ចិត្តយ៉ាងល្អ។

លោក Biden បានមានប្រសាសន៍ដោយទះដៃសាទរដល់ចៅក្រម Jackson ថា៖ «លោកស្រីចៅក្រម លោកស្រីជាមនុស្សស័ក្តិសមតាមនិយមន័យនៃអ្វីដែលយើងជាជនមានដើមកំណើតអៀរឡង់ហៅថា សេចក្តីថ្លៃថ្នូរ។ លោកស្រីមានសេចក្តីថ្លៃថ្នូរដ៏ខ្ពង់ខ្ពស់»។

មនុស្សម្នានាំគ្នាអបអរសាទរការអនុម័តតាំងតែងចៅក្រមលោកស្រី Ketanji Brown Jackson ឲ្យក្លាយជាចៅក្រមតុលាការកំពូលដំបូងគេបង្អស់ដែលជាស្ត្រីស្បែកខ្មៅ នៅបរិវេណខាងក្រៅតុលាការកំពូលសហរដ្ឋអាមេរិក កាលពីថ្ងៃសុក្រ ទី ៨ ខែមេសា ឆ្នាំ ២០២២។

លោកស្រីអនុប្រធានាធិបតី Harris ដែលជាស្ត្រីស្បែកខ្មៅដំបូងគេដែលបានកាន់តំណែងបច្ចុប្បន្នជាអនុប្រធានាធិបតីអាមេរិក ក៏បានមានប្រសាសន៍ដែរនៅក្នុងពីធីអបអរសាទរនៅសេតវិមាននោះ ដោយលោកស្រីបាននិយាយទៅកាន់លោកស្រី Jackson ថា លោកស្រី «បំផុសគំនិតលើកទឹកចិត្តដល់មេដឹកនាំជំនាន់ក្រោយៗ»។

លោកស្រី Harris បានមានប្រសាសន៍ថា៖ «ពួកគេនឹងមើលដំណើរសវនាការនៃការតែងតាំងលោកស្រី និងអានសេចក្តីសម្រេចរបស់លោកស្រី»។

លោកស្រីអនុប្រធានាធិបតី Harris បានធ្វើជាអធិបតីនៅក្នុងពេលបោះឆ្នោតអនុម័តការតាំងតែងដ៏ប្រវត្តិសាស្ត្រនោះ ទោះបីជាសមាជិកព្រឹទ្ធសភាមកពីគណបក្សប្រជាធិបតេយ្យ មិនត្រូវការសំឡេងបោះឆ្នោតរបស់លោកស្រី នៅក្នុងករណីដែលសំឡេងបោះឆ្នោតរបស់ព្រឹទ្ធសភាមកពីគណបក្សទាំងពីរស្មើគ្នាក៏ដោយ។

នៅក្នុងសវនាការដែលមានរយៈពេល ៤ ថ្ងៃរបស់គណៈកម្មាធិការតុលាការរបស់ព្រឹទ្ធសភាកាលពីខែមុន សមាជិកសភាមកពីគណបក្សប្រជាធិបតេយ្យបានសរសើរលោកស្រី Jackson អំពីបទពិសោធន៍ជ្រៅជ្រះរបស់លោកស្រី ដោយបានបម្រើការងារជិត ១០ ឆ្នាំនៅតុលាការកម្រិតសហព័ន្ធនិងឧទ្ធរណ៍ និងជាស្មៀនរបស់លោក Stephen Breyer ដែលជាចៅក្រមតុលាការកំពូល ដែលលោក Biden បានស្នើលោកស្រី Jackson ឱ្យកាន់តំណែងជំនួស។

លោក Dick Durbin ប្រធានគណៈកម្មាធិការតុលាការរបស់ព្រឹទ្ធសភា បានមានប្រសាសន៍នៅមុនការបោះឆ្នោតអនុម័តការតែងតាំងលោកស្រី កាលពីថ្ងៃព្រហស្បតិ៍ ទី ៧ ខែមេសា ថា៖ «លោកស្រីជាអ្នកជំនាញច្បាប់ដ៏មានទេពកោសល្យខ្ពស់ ក្នុងជំនាន់នេះ»។

លោក Durbin បានមានប្រសាសន៍បន្ថែមថា៖ «ដោយមានការអនុម័តតែងតាំងលោកស្រីចៅក្រម Ketanji Brown Jackson ឱ្យកាន់តំណែងចៅក្រមក្នុងតុលាការខ្ពស់បំផុតនៃប្រទេសនេះ យើងមិនមែនគ្រាន់តែធ្វើឱ្យមានសមិទ្ធផលដ៏សំខាន់មួយក្នុងប្រវត្តិសាស្ត្រតែប៉ុណ្ណោះទេ តែយើងក៏ថែមទាំងបន្តធ្វើតាមប្រពៃណីដ៏ល្អប្រសើរមួយរបស់អាមេរិក នៅក្នុងការលើកតម្កើងមនុស្សម្នាក់ក្នុងចំណោមជនដ៏ល្អបំផុតនិងពូកែបំផុតខាងច្បាប់ ឱ្យកាន់តំណែងដ៏មានកិត្តិយសមួយនេះ។ គ្មាននរណាម្នាក់ស័ក្តិសមនឹងទទួលកិត្តិយសខ្ពង់ខ្ពស់នេះ ក្រៅពីលោកស្រីនោះទេ»។

លោក Durbin ដែលជាសមាជិកព្រឹទ្ធសភាអាមេរិកប្រចាំរដ្ឋ Illinois មកពីគណបក្សប្រជាធិបតេយ្យ បានមានប្រសាសន៍ទៀតថា៖ «ដូចដែលយើងបានដឹងក្នុងពេលមួយខែមុននេះ លោកស្រីជាមនុស្សល្អបំផុតក្នុងចំណោមយើងទាំងអស់គ្នា។ លោកស្រីបានបូជាជីវិតរបស់លោកស្រី ដើម្បីបម្រើប្រទេសយើង។ លោកស្រីបានធ្វើកិច្ចការជាច្រើនក្នុងកម្រិតទាំងអស់នៃប្រព័ន្ធតុលាការសហព័ន្ធយ៉ាងប្រសើរ ហើយរាល់ពេល លោកស្រីពិតជាមានទេពកោសល្យលេចធ្លោ»។

លោកស្រី Jackson ក៏ជាអតីតមន្ត្រីការពារក្តីដំបូងគេម្នាក់ដែរ ដែលបានក្លាយជាចៅក្រមតុលាការកំពូល។ ប្រវត្តិលោកស្រីដែលតំណាងឲ្យជនជាប់ចោទ ហើយក្រោយមកធ្វើជាចៅក្រុមដែលបានកាត់ទោសឧក្រិដ្ឋជនផលិតរូបអាសអាភាសកុមារ បាននាំឱ្យមានការតវ៉ាពីសមាជិកព្រឹទ្ធសភាមកពីគណបក្សសាធារណរដ្ឋ ដែលអះអាងថា លោកស្រីមានជំហរទន់ជ្រាយលើរឿងឧក្រិដ្ឋកម្ម។

លោក Ted Cruz សមាជិកព្រឹទ្ធសភាមកពីសាធារណរដ្ឋបានទៅកាន់ក្រុមអ្នកសារព័ត៌មានកាលពីថ្ងៃព្រហស្បតិ៍ មុនការអនុម័តតែងតាំងលោកស្រី Jackson ថា៖ «ជាមធ្យម នៅទូទាំងប្រទេស ចៅក្រមសហព័ន្ធក្នុងស្រុកទាំងអស់កាត់ទោសក្រុមជនឧក្រិដ្ឋពីបទចែកចាយរូបអាសអាភាសកុមារឱ្យជាប់គុករយៈពេល ១៣៥ ខែ គឺ ៧៥ ខែយូរជាងទោសទាបបំផុតតាមច្បាប់ដែលបានតាក់តែងឡើង។ លោកស្រីចៅក្រម Jackson ជាមធ្យម បានកាត់ទោសជនជាប់ចោទដូចគ្នាទាំងនោះ តែ ១១,៩ ខែ ច្រើនជាងតាមច្បាប់ប៉ុណ្ណោះ។ នេះជាលំនាំដ៏រំខានមួយ»។

នៅក្នុងសវនាការតែងតាំងលោកស្រី Jackson ក្រុមអ្នកតាមដានពីសមាគមអ្នកច្បាប់អាមេរិកាំង ដែលជាសមាគមក្រុមមេធាវីនិងក្រុមនិស្សិតច្បាប់ដែលកំណត់ស្តង់ដារនៅតាមមហាវិទ្យាល័យនីតិសាស្ត្រ បានច្រានចោលការចោទប្រកាន់ដែលថាលោកស្រី «មានជំហរទន់ជ្រាយលើរឿងឧក្រិដ្ឋកម្ម»។

ការចូលកាន់តំណែងរបស់លោកស្រី Jackson មិនកែប្រែតុល្យភាព ៦ ទល់នឹង ៣ ដែលភាគច្រើនគ្របដណ្តប់ដោយចៅក្រមដែលមាននិន្នាការនយោបាយបែបអភិរក្សនិយមនៅក្នុងតុលាការកំពូលនោះទេ។ ទោះជាយ៉ាងនេះក្តី ក៏សមាជិកព្រឹទ្ធសភាមកពីគណបក្សសាធារណរដ្ឋ នៅតែសម្តែងកង្វល់អំពីការបោះឆ្នោតធ្វើសេចក្តីសម្រេចរបស់ចៅក្រម Jackson ដែលពួកគេបានចាត់ទុកថា នឹងមានជំហរបែបសេរីនិយម ដូចលោកស្រីចៅក្រម Elena Kagan និងលោកស្រីចៅក្រម Sonia Sotomayor ដែលអ្នកទាំងពីរនាក់ត្រូវបានតែងតាំងដោយប្រធានាធិបតីអាមេរិកមកពីគណបក្សប្រជាធិបតេយ្យ។

កាលពីថ្ងៃព្រហស្បតិ៍ ទី ៧ ខែមេសា លោក Mitch McConnell មេដឹកនាំគណបក្សសាធារណរដ្ឋនៃព្រឹទ្ធសភាអាមេរិក បាននិយាយនៅក្នុងកិច្ចប្រជុំព្រឹទ្ធសភាថា៖ «ប្រវត្តិប្រឡូកក្នុងប្រព័ន្ធតុលាការរបស់លោកស្រី ពោរពេញដោយករណីដែលលោកស្រីចៅក្រម Jackson បានធ្វើសេចក្តីសម្រច ដូចជាអ្នកអនុម័តគោលនយោបាយដោយប្រើការលម្អៀងផ្ទាល់ខ្លួន ជាជាងធ្វើសេចក្តីសម្រេចជាចៅក្រមម្នាក់ដែលធ្វើតាមខ្លឹមសារច្បាប់»។

សម្រាប់ក្រុមប្រជាធិបតេយ្យនិងការិយាល័យសេតវិមានរបស់លោក Biden វិញ ការតែងតាំងលោកស្រី Jackson ឱ្យចូលកាន់តំណែងដែលមានសុពលភាពមួយជីវិតនេះ គឺជាជ័យជម្នះមួយ នៅក្នុងអំឡុងពេលដ៏លំបាកមួយសម្រាប់គណបក្សប្រជាធិបតេយ្យ។

លោក Chuck Schumer មេដឹកនាំគណបក្សប្រជាធិបតេយ្យនៃព្រឹទ្ធសភា បានមានប្រសាសន៍នៅក្នុងកិច្ចប្រជុំព្រឹទ្ធសភា កាលពីថ្ងៃព្រហស្បតិ៍ ទី ៧ ខែមេសាថា៖ «នេះជាថ្ងៃដ៏សែនសោមនស្ស ជាថ្ងៃដ៏សំខាន់ជាលើកដំបូងមួយ។ សមិទ្ធផលដ៏សំខាន់នេះគួរកើតមានឡើងតាំងពីជំនាន់មុនៗ តែយើងតែងតែដើរតាមមាគ៌ាមួយឆ្ពោះទៅកាន់សហភាពមួយដ៏ល្អប្រសើរជាងមុន។ តែយ៉ាងណាក៏ដោយ ក៏សហរដ្ឋអាមេរិកនៅថ្ងៃនេះបានបោះជំហានដ៏ធំមួយទៅកាន់ការធ្វើឱ្យសហភាពរបស់យើងកាន់តែល្អប្រសើរជាងមុន»។

លោកស្រី Linda Thomas-Greenfield ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ បានមានប្រសាសន៍ប្រាប់វីអូអេថា៖ «ខ្ញុំរំភើបចិត្តអំពីព្រឹត្តិការណ៍នេះ ហើយខ្ញុំមានមោទនភាពផងដែរ។ យើងបានចំណាយពេលយូរណាស់ដើម្បីបានសមិទ្ធផលនេះ។ តែវាជាពេលវេលាដ៏ប្រវត្តិសាស្ត្រមួយ ហើយជាពេលវេលាមួយដែលខ្ញុំមានមោទនភាព ដោយបានឃើញដោយផ្ទាល់នឹងភ្នែក។ ហើយខ្ញុំចាំមើលអ្វីដែលលោកស្រីអាចធ្វើឱ្យសម្រេចបាននៅ ក្នុងតុលាការនេះ»។

លោកស្រី Jackson ចូលរួមកាន់តំណែងជាចៅក្រុមតុលាការកំពូលបីនាក់ទៀត ដែលជាស្ត្រីគឺលោកស្រីចៅក្រម Sotomayor លោកស្រី Kagan និងលោកស្រី Amy Coney Barrett ហើយនេះជាលើកដំបូងហើយដែលតុលាការកំពូលសហរដ្ឋអាមេរិក មានចៅក្រមជាស្ត្រីចំនួន ៤ នាក់ នៅក្នុងពេលតែមួយ៕

អ្នកស្រី Margaret Besheer អ្នកយកព័ត៌មានឲ្យវីអូអូប្រចាំអង្គការសហប្រជាជាតិ រាយការណ៍បន្ថែម។

ប្រែសម្រួលដោយលោក ឈឹម សុមេធ