- ដោយ RFE/RL
សហភាពអឺរ៉ុបនឹងផ្តល់ហិរញ្ញវត្ថុសម្រាប់ទិញអាវុធឱ្យអ៊ុយក្រែន
សហភាពអឺរ៉ុបគ្រោងចាត់វិធានការដែលខ្លួនមិនធ្លាប់ធ្វើពីមុនមក ក្នុងការផ្តល់ហិរញ្ញវត្ថុសម្រាប់ទិញអាវុធឱ្យអ៊ុយក្រែន។ នេះបើតាមការបញ្ជាក់របស់មន្ត្រីសហភាពអឺរ៉ុបកាលពីថ្ងៃទី២៧ ខែកុម្ភៈ ខណៈដែលអង្គការតំបន់មួយនេះបានប្រកាសពីទណ្ឌកម្មថ្មីៗទៀតដើម្បីឆ្លើយតបនឹងការឈ្លានពានរបស់រុស្ស៊ីលើអ៊ុយក្រែន។ នេះបើតាមការរាយការណ៍របស់បណ្តាញព័ត៌មាន RFE/RL៕
- ដោយ Reuters
សហរដ្ឋអាមេរិកទទូចឱ្យពលរដ្ឋខ្លួនពិចារណាចាកចេញពីរុស្ស៊ីភ្លាមៗ
ក្រសួងការបរទេសសហរដ្ឋអាមេរិកនិយាយកាលពីថ្ងៃអាទិត្យថា ពលរដ្ឋអាមេរិកគួរពិចារណាចាកចេញពីប្រទេសរុស្ស៊ីភ្លាមៗ តាមជើងយន្តហោះស៊ីវិល ដោយក្រសួងនេះបានយោងលើតួលេខអាកាសចរណ៍កាន់តែច្រើនដែលសម្រេចលុបចោលជើងហោះហើរហើយប្រទេសកាន់តែច្រើនដែលសម្រេចបិទដែនអាកាសរបស់ខ្លួនចំពោះយន្តហោះពីប្រទេសរុស្ស៊ី ក្រោយពីរុស្ស៊ីបានចូលឈ្លានពានអ៊ុយក្រែន។ នេះបើតាមការរាយការណ៍របស់ទីភ្នាក់ងារព័ត៌មានReuters។
- ដោយ AP
ទាហានបម្រុងអ៊ុយក្រែនត្រៀមការពារប្រទេស
ទាហានបម្រុងអ៊ុយក្រែនកំពុងត្រៀមខ្លួនការពារប្រទេសរបស់ពួកគេពីយោធារុស្ស៊ីនៅថ្ងៃអាទិត្យ។
សមាជិកនៃកងកម្លាំងការពារដែនដីដែលមានមូលដ្ឋាននៅទីក្រុង Fastiv ជិតរដ្ឋធានីកៀវ កំពុងត្រូវបានបង្រៀនអំពីវិធីសង្រោះបន្ទាន់ដំបូង ការហ្វឹកហាត់ប្រើប្រាស់អាវុធ និងក្បួនការពារសំខាន់ៗ មុនពេលចាកចេញពីមូលដ្ឋានរបស់ពួកគេដើម្បីល្បាតក្នុងតំបន់។
រដ្ឋធានីកៀវមានភាពស្ងប់ស្ងាត់ បន្ទាប់ពីការផ្ទុះធំៗនៅពេលព្រឹក ហើយអាជ្ញាធរបានរាយការណ៍ពីការផ្ទុះនៅអាកាសយានដ្ឋានមួយរបស់ខ្លួនកាលពីថ្ងៃអាទិត្យ។
- ដោយ Reuters
ពលរដ្ឋអ៊ុយក្រែនដែលជាប់ក្នុងរថយន្តជាច្រើនថ្ងៃ រង់ចាំពេលអាចភៀសខ្លួនចេញ
ពលរដ្ឋអ៊ុយក្រែនរាប់ពាន់នាក់បានភៀសខ្លួនពីភាគខាងកើតប្រទេសដែលនៅជិតរុស្ស៊ី ទៅកាន់ភាគខាងលិចប្រទេសដែលជាប់ព្រំដែនប្រទេសប៉ូឡូញ ក៏ប៉ុន្តែពេលទៅដល់ទីនោះ ពួកគេបានប្រទះនឹងទុក្ខលំបាកថ្មីមួយទៀត។
ទីភ្នាក់ងារព័ត៌មាន Reuters បានរាយការណ៍ថា កាលពីរសៀលថ្ងៃអាទិត្យ មានជួររថយន្ត រថយន្តក្រុង និងរថយន្តកុងតឺន័របន្តគ្នាយ៉ាងវែងរហូតដល់៣៥គីឡូម៉ែត្រ តាំងពីច្រកព្រំដែន Shehyni មកដោយរថយន្តនិមួយៗពោរពេញដោយមនុស្សនិងអីវ៉ាន់របស់ពួកគេ ដែលម្នាក់ៗសុទ្ធតែរង់ចាំវេនខ្លួនដើម្បីបញ្ច្រៀតចូលទៅកាន់បុស្តិ៍ត្រួតពិនិត្យច្រកព្រំដែនដ៏លើសចំណុះដើម្បីឆ្លងចូលទៅប៉ូឡូញ។
មនុស្សរាប់រយនាក់ផ្សេងទៀតបានដើរថ្មើរជើង ដោយដើរយ៉ាងលំបាកកាត់សំរាមរាយប៉ាយតាមបណ្តោយផ្លូវជាតិល្បឿនលឿន ក្នុងធាតុអាកាសក្រោមសូន្យអង្សារ ជាមួយកូនៗ សត្វចិញ្ចឹម និងរាល់ទ្រព្យអីវ៉ាន់ផ្ទាល់ខ្លួនដែលពួកគេមានកម្លាំងអាចយកមកតាមខ្លនបាន៕
